سلسلة مدمرات العلاقات الزوجية : ((( انكار الحب )))

النهاردة عايزة اتكلم عن ظاهرة انكار الحب و دي ممكن تحصل باللا وعي و هوريكم ازاي في حوار زوجي

================

الزوج : صباخ الخير يا حبيبتي

الزوجة مبتسمة : صباح الخير

في وسط الفطار

الزوج: شوفتي يا حبيبتي الخبر دا ... دا مرسي ناوي ....

الزوجة : انا معترضة على قرارات مرسي و وووو ....

================

حوار تاني :

الزوجة في وسط عشاء رومانسي و بالشموع : انت واحشني أوي تعرف انا اكتشفت اني بحبك أوي

الزوج : سيبك انتي الفستان حلو اوي و العشا شكلك تعبتي فيه

طبعا مش عايزة اكتب الزوجة ممكن ترد عليه تقوله ايه غير انها تحدفه بحاجة ههههههههههههههه

===============

الشاهد من الحوارين

ساعات طرف ممكن يعبر بلغة صريحة عن جبه باستخدام عبارات " بحبك " أو حبيبتي أو حبيبي

و الطرف التاني يتجاهله دا بيوصل احساس للطرف اللي عبر عن حبه انه ما بيحبوش

و الأفظع من كدا لما زوج يقول لزوجته انا بحبك و يا رتيها تتجاهل لأ دي ترد عليه و تقوله مش مصدقاك !!!!

و العكس صحيح بيحصل

لما زوجة تعبر لزوجها عن حبها و غالبا بتعمل كدا وسك خناقة او شد أو مشكلة محاولة منها للتخفيف من الموقف

يرد سي سيد برد رهيب عجيب : انا مش مصدقك

الانكار أو التجاهل هو قاتل صريح للعلاقة الزوجية و بيهز ثقة الزوجين ببعض بطريقة مباشرة جدا

و في بقى اللي زوجها يقولها انتي حلوة النهاردة الفستان لايق عليكي و لعدم ثقتها بنفسها تقوله انا مش مصدقاك أو يبان عليها انها حقيقي مش مصدقاه

عايزين نتفق على حاجات ثابته خصوصا لو الزوجة الطرف اللي بينكر :

1- العلاقة الزوجية علاقة ممتدة زي أي علاقة و مش مجزأة بمعنى ان أكيد أكيد هيمر عليكم لحظات سعادة و لحظات شد و جذب و لحظات مشاكل و لحظات رومانسية

ما ينفعش نختزل اللحظات دي بتعبيرات حب معينة و نتناسى اللحظات التانية و غالبا دا بيحصل وسط المشاكل الطرفين بينسوا انهم بيحبوا بعض من الأساس

و ما ينفعش حد يعتقد انه هيعيش على وتيرة واحدة من الصفاء في العلاقة الا ان كان واهم

2- انكار و تجاهل الحب هيقتل الحب دا خصوصا ان لحظة التعبير عن الحب ما بتكونش بس عبارة عن كلمات لفظية لكن بتكون بتوقيت زمني معين حامل لأحاسيس معينة معنى تجاهلها أو انكارها مش بيكون بس كرد لفظي دا بيسيب علامة جوة قلب الزوج أو الزوجة

فالزوجة الذكية هي اللي بتتحسس مواصع تعبير الزوج عن الحب و تبدأ تبني في اللحظات دي علاقة أقوى بتأكيد الحب دا و كذلك الزوج الا ان العلاقة هتفتر لو ما حصلش كدا

طبعا المعظم دلوقتي بيقول انا زوجي هو اللي بيتجاهل و بينكر

أؤكدلك مليون في المية ان في بداية علاقتك الزوجية انتي أنكرتي او تجاهلتيه لدرجة تلقائية حصل انكار و تجاهل

طيب المشكلة دي تحلها ازاي خصوصا انا عارفة ان معظم اللي بيعمل الحركة دي هم الأزواج

1- لو انتي من النوع اللي بيعبر عن حبه كتير طول الوقت قللي التعبير دا شوية و خاليه بيطلع في لحظة رومانسية خاصة و ابتكري في لحظاتك الرومانسية

2- لو حصل في وسط حوار و حصل تجاهل لتعبيرك عن حبك ما تعديش الموقف عابرا عشان ما يسيبش جواك علامة لكن الفتي نظره بابتسامة خفيفة قوليله مثلا : تعرف الأقرب لقلبي دلوقتي انك انت كمان تعبرلي عن حبك ... لأن ممكن ببساطة هو يكون ماخدش باله

3 - اوعي تتخانقي بسبب التجاهل

لأن الخناق ع التجاهل هيجيب تجاهل و هيحس ان حبك أصبح اجبار عليه و دي آخر حاجة الست تبقى عايزة تحسها

4 - فترة زي دي زي ما اتفقنا محتاجة تعززي ثقتك بنفسك بإظهار مراكز القوة اللي عندك في شخصيتك و مظهرك و لما ثقتك ترجع لنفسك هتلاقيه بيعبر تلقائي عن مشاعره ناحيتك

و الأفضل تسيبيه فترة من غير تعبير عن مشاعر غير طبعا بالتصرفات انا م بقول تبقي جافة معاه لكن توقفي الكلام الحلو شوية و زي ما قولنا تطلعي في لحظة خاصة